كنت ماشي بالحارة بين (رجال العز) وكان في (3 صبايا) حلوين، وفجأة نادالي (الزعيم) وطلب مني اطلع (فوق السقف) طبعاً مافيني اكسر كلمتو وطلعت فوراً مشان صلحلو (الخربة)، وشفتلكون من الشباك هديك الشوفة (جلسات نسائية) بتطير العقل وكان الحديث عن وحدة فيون بدها تعمل (ولادة من الخاصرة) يبدو عندا مشكلة بس عيوني بصراحة كانت على كم وحدة كانوا وائفات عالـ (مرايا) وعم يسرحوا شعراتون، سمعت صوت وصرت اشتغل ومشيت ع ال...سور وكان في شباك تاني مفتوح، وشفتا.. وحسيت عقلي رح يطير من الفرح وقت شفت الـ (شيفون) اللي كانت لابستو، قربت وكتير فكرت احكي معها بس كان ضميري صاحي وقاللي لأ يا هاني هاد هو (العشق الحرام) وما بيصير تعمل هيك شي، بس الصراحة لما اختفت ما قدرت ما قرب ع الشباك، وشفت حفلة تنكرية بتجنن ذكرتني بـ (يوميات مدير عام) وقت كان المدير يتنكر وماحدا يعرفو، وطبعاً تذكرت الحفلات اللي كنا نعملها (أيام الدراسة) يا سلام شو كانت حلوة، بلحظة صغيرة بلش (كشف الأقنعة) ورجعت شفتا، وحسيت حالي بدي افتل على كل المحلات اللي بـ (سوق الورق) واصرخ اني لقيتا البنت اللي حبيتا، بس انا معتر على قد حالي وهيك صبية صعب ترضى فيني ويمكن بتعتبرني واحد من شلة شباب (صايعين ضايعين) بيتفتلو بالحارة بدون شغل وبدون تعب، وبلحظة صارت البنات تصرخ وما لقيت حالي غير جوا لشوف شوفي، صاروا يقشروا ع السقف وأنا نطيت وقتلتو، أي قتلتو مع إني من جوات قلبي حبيتو وسميتو (الدبور) اللي كان السبب بدخولي لهيك غرفة مليانة بنات وخصوصي البنت اللي حبيتا واللي صرت بعينا بطل، وفجأة دق الباب ودخل الزعيم وشافني وطاش حجرو، انا تلبكت كتير خصوصي انها طلعت بنتو وقالتلو اهلين يابي، صرخ فيني صوت ومالقيت حالي غير وقعت بأرضي وصرت اطلب (الغفران) بس بنتو حكتلو الحكاية وانبسط مني كتير وفكرت استغل المناسبة بس اتذكرت أنا ابن مين وهية بنت مين، (طالع الفضة) هيك كانت تقلي إمي وقت كانت تشوف كفي، وكنت اسألها شو يعني وكانت تجاوب بإنو حظي هيك ومستحيل يكون دهب بيوم من الأيام، حملت حالي وطلعت، وسمعت كلمة طيرتلي عقلي من البنت، قالتلي إنت بتشبه مهند، وبصراحة فرحت كتير، وبعد فترة صرنا نتلاقى ولو ما كنت (الشبيه) لمهند يمكن ماكانت قبلت تطلع معي،
وتزوجنا وصارت هية بالنسبة إلي (ملح الحياة) والشعر صار هوايتي وصرت اعشق (محمود درويش) ونزار قباني، وبعد فترة صارحتي بإني ما بشبه مهند وقالتلي بالحرف الواحد إني أحلى منو..
ويومها تأكدت إنو حظي دهب مو فضة
متل ما قالت إمي...
وعشنا بتبات ونبات وخلفنا صبيان وبنات..
موضوع: خبر عـــــــاجل 
9/8/2011, 6:36 pm
